Jimol Wutteeji Jeeɗiɗi ɗi Fulɓe

Jimol Wutteeji Jeeɗiɗi ɗi Fulɓe. 

Yoo, Buuɗal yurmeende mutii! 

Hol mo wiinoo hiirataa? 

Hiiri haa caafe carfe cooye ñonngiima, njirliima, njawtoyii to ñalawma heedi.

Leydi mojiima ɓuuɓol.

Yoo jam hiir, waala, weeta haa to yilmere e niɓɓere njerondiri.

Jawdi hisii, jofii renndii, taariima wuro.

Besngu naattii, fooftiima e koɗorɗe.

Yoo gite Bannda en koode jamma ndeen.

Ɗate koode pettii, layii, caakiima e dow binnde Geno, Dunndari.

Ɗe tiimto e beeli keeli Tooro e dalli keeli Keeri e Booro.

Minen ɓiɓɓe Fulɓe min piɓii woondoore 

E barke gawri kosam e nebam

E wonki debbo e nagge

E horma Burgal cippoowo e sawru duroowo,

Min ɓoorniima ɗiiɗoo wutteeji jeeɗiɗi, ɗi min ceekataa, ɓoortataa jamma e ñalawma: 

1.Goo, wutte Enɗam sañiraa garaaji yurmeende.

2.Diɗi, wutte dewgal ñootiraa mesalal sutura, suura, huura.

3.Tati, wutte gilli, goobiraa Hoolaare.

4.Nay, wutte jawdi, haddiraa Barke

5.Joy, wutte ganndal suddiraa nuunɗal

6.Jeegom, wutte gonndigal teppaa, sinkaa cuɗaari muñal

7.Jeeɗiɗi, wutte teddungal, wakkaa, wakkitiraa nehdi. 

Hah Yoo hiiri, hoodere weetndooga jowtaama! 

Nde uddii hariimaaji e durunɗe bannge mutal.

Nde udditii hariimaaje e durunɗe bannge puɗal.

Koode kammu nduusii jamma.

 Wallifo Ceerno Aamadu Saajo Jah e Ceerno Aamadu Wuuri Jallo.